अन्तर्राष्ट्रिय कर्णाली चलचित्र महोत्सवको दोस्रो संस्करण प्रारम्भ

सुर्खेत — अन्तर्राष्ट्रिय कर्णाली चलचित्र महोत्सवको दोस्रो संस्करण आइतबारदेखि सुरु भएको छ । रेड चेरीको आयोजना तथा चलचित्र विकास बोर्डको सहकार्यमा आयोजित महोत्सव फागुन २५ देखि २६ गतेसम्म कर्णालीमा सम्पन्न हुनेछ ।दुई दिनसम्म सञ्चालन हुने महोत्सवमा नेपाली चलचित्रको प्रवर्धन र विकाससँगै चलचित्र र पर्यटन जोड्न विविध गतिविधि सञ्चालनका विषयमा छलफल हुनेछ । महोत्सवका निर्देशक चक्रबहादुर चन्दका अनुसार कर्णाली महोत्सवले कर्णालीका ऐतिहासिक र सांस्कृतिक महत्त्वलाई राष्ट्रिय तथा अन्तर्राष्ट्रियस्तरमा पुर्‍याउने गरी रारा चलचित्र पर्यटन तथा जलवायु परिवर्तन ‘समिट’ पनि आयोजना गर्नेछ । महोत्सवको उद्घाटन कर्णाली प्रदेशका प्रदेशका मुख्यमन्त्री यामलाल कँडेलले गर्नुभएको थियो । उद्घाटनपछि बोल्दै मुख्यमन्न्री कँडेलले कर्णालीलाई गरीबको उपमा दिन जरुरी नरहेको बताए । ‘विकट र अभावै अभावको उपमाले बुझिने कर्णालीले अब आफ्नो पहिचान बदलिएसकेको छ,’ उनले भने ।

विशेष अतिथिका रूपमा पूर्वमुख्यमन्त्री जीवनबहादुर शाही, पूर्वराज्यमन्त्री कुन्ती शाही, पूर्वमन्त्री रामकुमारी झाँक्री, चलचित्र विकास बोर्डका अध्यक्ष दिनेश डीसी, अभिनेता प्रदीप खड्का, फिल्म ‘पुजार सार्की’ फेम्ड लेखक एवं निर्देशक विकास सुवेदी सहभागि थिए । महोत्सव निर्देशक चक्रबहादुर चन्दले कर्णालीलाई चलचित्र पर्यटन गन्तव्यका रूपमा प्रवर्द्धन गर्ने उद्देश्यले महोत्सव आयोजना गरिएको बताए । यस अवसरमा विकास सुवेदीको निर्देशनमा बन्न लागेको ‘२६ करोड’ नामक फिल्मको कर्णालीमै छायांकन गर्ने औपचारिक सम्झौता समेत गरियो ।